#PakingganSiya ngayong Semana Santa

Noong Linggo ng Palaspas, matagumpay na pumasok si Jesucristo sa Jerusalem habang ang Kanyang mga tagasunod ay naglalatag ng mga balabal at palaspas sa Kanyang daraanan. Tinanggap nila Siya nang may galak at papuri. Alam nilang espesyal ang taong ito, bagaman kakaunti lamang, kung mayroon man, ang nakauunawa sa kabuuan ng misyon ni Jesus at na malapit na Niya itong isakatuparan.

Ang isang bagay na magagawa natin para maanyayahan ang impluwensya ni Jesucristo sa ating buhay ay ang pagpapaalam sa mga taong nakapaligid sa iyo na mahal mo sila, tulad ng pagmamahal Niya. Maglaan ng oras ngayong araw na magpadala ng mensahe sa isang tao na nagpapahayag ng pagmamahal mo sa kanya.

Pagkatapos pumasok sa Jerusalem, ang isa sa mga unang pinuntahan ni Jesus ay ang templo. Doon, sa bahay ng Kanyang Ama, nakita ni Jesus ang maraming mangangalakal na nagnenegosyo. Ang makita na ang isang lugar ng pagsamba ay ginawang lugar ng komersyo ay isang bagay na hindi matiis ni Jesus. Nagsasalita nang may awtoridad, inutusan Niya silang umalis.

Maglaan ng oras ngayong araw kung kailan hindi mo gagamitin ang iyong mga device at gumawa ng isang bagay na nakabubuti sa kaluluwa, ito man ay paggugol ng oras kasama ng iyong pamilya, pagninilay tungkol sa buhay, o kung anumang bagay na maglalapit sa iyo sa Diyos.

Sa Jerusalem, si Jesucristo ay napalibutan ng mga tagasunod at mga kritiko. Bilang dakilang guro, hindi Niya sinayang ang pagkakataong ito. Dito, sa huling linggo ng Kanyang buhay, ibinahagi Niya sa mga taong nagtipon ang ilan sa Kanyang pinakamahahalagang turo. Tinulungan Niya sila (at tayo) na malaman na ang pinakadakilang paraan na mapaglilingkuran natin ang Diyos ay sa pamamagitan ng paglilingkod sa ating kapwa.

Maglaan ng oras ngayong araw na paglingkuran ang isang tao. Maaari itong malaki o maliit na gawain, para sa isang tao sa inyong tahanan o online. Gawin mo lang ang lahat ng iyong makakaya para makagawa ng kaibhan sa buhay ng isang tao.

Habang patuloy si Jesucristo sa pagtuturo sa kanyang mga tagasunod, isang bagay ang naging malinaw—si Jesus ay may malalim na kaalaman at pagmamahal sa mga banal na kasulatan. Sa buong linggo, madalas na binanggit ni Jesus ang mga banal na kasulatang isinasakatuparan Niya.

Magbahagi ng isang talata na tumutulong sa iyo na madama na mas malapit ka kay Jesucristo.

Noong Huwebes ng gabi, tinipon ni Jesucristo ang Kanyang mga Apostol para magsalu-salo at para ipahayag ang Kanyang pagmamahal sa kanila. Ang Huling Hapunan ay tahimik at kalugud-lugod na sandali na naganap bago pumasok si Jesucristo sa Halamanan ng Getsemani kalaunan noong gabing iyon. Hindi naunawaan ng Kanyang mga Apostol ang pagdurusang dadanasin Niya, ngunit alam nila na isang sagradong pangyayari ang nagaganap nang anyayahan sila ng kanilang matalik na kaibigan at Guro na alalahanin Siya.

Ngayong araw, tukuyin ang mga pagpapalang natanggap mo sa buhay mo dahil sa sakripisyo ni Jesucristo. Habang inaalala mo ang mga pagpapalang ito, maglaan ng oras na ibahagi ang iyong mga dahilan.

Nang madaling-araw na, si Jesus ay ipinagkanulo sa mga kamay ng mga lokal na awtoridad. Pagkatapos ng sunud-sunod na hindi patas na paglilitis, Siya ay nahatulang mamatay sa pagpapako sa krus. Habang nakapako sa krus, Siya ay napalibutan ng mga taong malupit na kumutya sa Kanya. Ngunit sa halip na hatulan sila, nagsumamo si Jesucristo sa Kanyang Ama na “patawarin ... sila, sapagkat hindi nila nalalaman ang kanilang ginagawa.”

Anyayahan ang kapayapaan sa iyong buhay sa pamamagitan ng pag-iisip sa isang taong maaari mong patawarin.

Mahirap isipin ang dalamhating nadama ng mga tagasunod ni Jesucristo noong araw pagkatapos ng Kanyang kamatayan. Noong gabi bago ito, ang Kanyang katawan ay maingat na inihanda at inilagay sa libingan. Nang panahong iyon, inisip nila kung paano nila ipagpapatuloy ang kanilang buhay nang wala Siya.

Maglaan ng oras ngayong araw para ibahagi sa Diyos sa pamamagitan ng panalagin ang mga nilalalaman ng iyong puso habang naghahanda kang ipagdiwang ang kagalakang hatid ng Linggo ng Pagkabuhay.

Maagang-maaga pa, si Maria Magdalena, na kaibigan at tagasunod ni Jesus, ay dumating sa libingan para pangalagaan ang katawan ni Jesucristo. Laking gulat niya nang makita niyang walang laman ang libingan. Ngunit hindi siya nag-iisa. Isang lalaki ang tumawag sa kanya, na inakala niyang hardinero. Ngunit binanggit Niya ang kanyang pangalan, “Maria.” At nakita niya. Siya si Jesus. Ang Cristo ay buhay.

Ngayong araw, punuin ng kagalakan ang inyong tahanan habang pinagninilayan mo ang Pagkabuhay na Mag-uli ni Jesucristo. Hinihikayat kang magdiwang sa pamamagitan ng nagbibigay-inspirasyong musika at mga video.